Gazeta Mapo ka siguruar foton e Erion Alibej, 34-vjeçarit që porositi dhe organizoi vrasjet e Emiljano Ramazanit dhe Regis Runajt në Elbasan.
Erion Alibej përdorte edhe emrat Andrea Alibej dhe Erion Dylgjeri. 34-vjeçari është një emër i njohur, pasi së bashku me vëllain e tij Indrit Alibej (të vrarë në Elbasan në 2018-në) drejtonin një rrjet të trafikut të drogës në Itali e Holandë.
34-vjeçari dyshohet se i organizoi vrasjet për konfliktet mes grupeve që merreshin me drogë. Erion Alibej cilësohet si një person me rrezikshmëri të lartë.
Erion Alibej është vëllai i Endrit Alibejt (që njihej me nofkat “Tino” dhe “Tarzan”) që ishte shënjestra së bashku me xhaxhanë e tij, Arben Dylgjeri dhe turkun Erdal Durunay që u ekzekutuan në 29 dhjetor të 2018 në Elbasan.
Erion Alibej ka qenë i dënuar në Itali me 4.5 vite burg për trafik kokaine. Ai u arrestua në Torino në 2012 së bashku me disa anëtarë të tjerë të bandës, ndërkohë që pasi shleu dënimin u rikthye në vend.
Në Shqipëri telashet nuk kishin të mbaruar, pasi rreth 2 vite e gjysmë më parë u arrestua për një plagosje dhe tani ndodhej në arrest shtëpie. Ai akuzohet se plagosi Xhon Rustën. Por fakti se ishte nën akuzë dhe në arrest shtëpie nuk e pengoi që të porosiste tre vrasje. Erion Alibej është në skedat e policisë si person me rrezikshmëri, por nuk arritën që të parandalonin krimet.
Grupi i kokainës:
Sipas policisë italiane të dy vëllezërit drejtonin një grup te trafikut të drogës nga Holanda drejt veriut të Italisë. Sipas dosjes italiane dy vëllezërit të konsideruar si koka e grupit u vendosën në përgjim në gusht të vitit 2011 pasi dyshoheshin për trafikim dhe shpërndarje droge në veri dhe në qendër të Italisë. Po sipas dosjes hetimore dy vëllezërit kishin kontakte të shumta si me furnizuesit e lëndës narkotike ashtu edhe me blerësit.
Përgjimet shkuan deri në Amsterdam ku Endrit Alibej shfaqej duke bërë pazare droge me një bashkatdhetarin shqiptar te identifikuar nga policia italiane me emrin Astrit. Në grupin që u godit në Itali në 2012 ka pasur shqiptarë, afrikanë dhe italianë, kokaina trafikohej nga Holanda në Itali.
Erion Alibej
LEXO EDHE:
Arrestohet personi që porositi dy vrasjet në Elbasan (Emri+Detajet)
