Pavarësisht përhapjes së pandemisë së koronavirusit, Lojërat Olimpike të Tokios do të zhvillohen. Lajmi konfirmohet nga kreu i Organizatës Botërore të Shëndetësisë, Tedros Adhanom Ghebreyesus.
Ai ka thënë se Lojërat Olimpike në Tokio duhet të mbahen, në mënyrë që t’i tregojnë botës se çfarë mund të arrihet me plan dhe masa të duhura. Duke folur në Tokio para Komitetit Ndërkombëtar Olimpik, ai tha se bota ka nevojë për Olimpiadë “si festë për shpresë”.
“Lojërat Olimpike kanë fuqi për të bashkuar botën, për ta inspiruar dhe për të treguar se çfarë është e mundshme”, është shprehur shkurtimisht Ghebreyesus.
Lojërat Olimpike do të nisin më 23 korrik, teksa rriten shqetësimet për siguri, meqë mijëra atletë dhe staf mbështetës janë duke shkuar në Japoni, ndërkohë që varianti Delta i koronavirusit përhapet shpejt në botë.
Tedros ka folur teksa organizatorët kanë raportuar për tetë infektime të reja në mesin e pjesëmarrësve në Lojëra, duke e çuar numrin total të infektimeve në 79.
Lojërat Olimpike, që janë shtyrë nga viti i kaluar për shkak të pandemisë, do të mbahen këtë vit pa spektatorë, për shkaqe sigurie.
