Vijon saga e emigrantëve që tentojnë të largohen nga vendet e tyre drejt BE-së. Shqipëria është kthyer në një vend tranziti dhe shpesh shumë prej tyre kanë rënë në prangat e policisë.
Në kuadër të operacionit të koduar “Danubi 7”, i zhvilluar nga Seksioni për Hetimin e Trafiqeve të Paligjshme, në bashkëpunim me Sektorin e Policisë Rrugore, në DVP Elbasan, janë goditur 2 raste të veprimtarisë kriminale në fushën e dhënies ndihmë për kalim të paligjshëm të kufirit.
Po ashtu, në pranga kanë rënë 2 shtetas, të cilët u kapën duke transportuar 7 emigrantë të paligjshëm, me 2 automjete. Dy personat e moshës 34 dhe 36 vjeç, nga Korça dhe Pogradeci, u kapën nga policia e Elbasanit.
Një prej automjeteve u ndalua në fshatin Xibrakë dhe brenda saj ndodheshin 3 emigrantë të paligjshëm, të cilëve u ishte premtuar kalimi drejt vendeve të BE-së, kundrejt pagesës 50-150 euro për person.
Makina tjetër u kap në aksin rrugor Labinot-Elbasan. Në të ndodheshin 4 emigrantë të paligjshëm.
Policia në vendin tonë prej kohësh tashmë ndalon vazhdimisht persona të cilët akuzohen për ndihmesë në kalimin e paligjshëm të kufijve.
