Në ndeshjen mbrëmë mes Arsenal dhe Wolves, që në fillim, ndodhi një përplasje dramatike kokë me kokë mes David Luiz dhe Jimenez.
U kuptua se ishte një incident i fortë. Jimenez nuk po lëvizte, dhe ishte në një gjendje pa ndjenja në fushë.
Ekipi shëndetësor, ofroi edhe oksigjen për lojtarin e Wolves. Më tej, në spital, futbollisti iu nënshtruar një operacioni në kokë.
Ndërkaq, edhe David Luiz ishte i gjakosur.
Po ajo çka ka hapur një debat të fortë në gjithë Anglinë, është pse braziliani u lejua të vijonte lojën.
Pamjet gjatë gjithë kohës nxirrnin ballin e tij të gjakosur, edhe pse Luiz ishte fashuar.
Trajnerët dhe futbollistët, dhe gazetarët po reagojnë me revoltë duke thënë se kjo gjë nuk duhet lejuar më. Nëse dikush gjakoset, ai duhet zëvendësuar, nuk mund të vijojë më lojën, po thonë të gjithë.
Ekipi i Arsenalit është mbrojtur, duke deklaruar se në rastin e Luiz janë ndjekur të gjitha protokollet në fuqi. Dhe vetë lojtari është shprehur i ndërgjegjshëm se ishte në gjendje të vijonte lojën. Ndërkaq, edhe pse e mbylli pjesën e parë në fushë, Luiz nuk është paraqitur në pjesën e dytë.
