Gjarpërinjtë, minjtë, derrat, qentë dhe kafshë të tjera qarkullojnë lirshëm nëpër periferitë e Romës, duke depërtuar brenda shkollave dhe kopshteve.
“A po shndërrohen shkollat e Romës, në një xhungël”, ka ngritur shqetësimin në një artikull e përditshmja italiane, “Il Messaggerio”. Shqetësimi më i fundit është ai i së martës (17 maj) kur një gjarpër u pa duke u zvarritur në Institutin Majorana, jo shumë larg Parkut Campagna.
Gjarpri është vënë re nga nxënësit të cilët e kanë parë pas një stoli, brenda në dhomat e zhveshjes. Një ditë më parë një tjetër pamje, me derra, në të njëjtën zonë, por në një shkollë tjetër.
Mediat italiane ngrenë shqetësimin, se në lagjet dhe rrugët periferike të Romës qarkullojnë kafshë, përfshirë edhe të rrezikshme për jetën e njeriut, duke e shndërruar kryeqytetin italian, sidoemos shkollat dhe kopshtet, në një xhungël. Shumë raste edhe pse janë denoncuar në media dhe rrjetet sociale, pasi kafshë të egra dhe të rrezikshme shfaqen pranë shkollave, fenomeni vazhdon të jetë prezent.
Kryeqyteti shqiptar Tirana mund të jetë edhe më problematik në këtë drejtim, por ka se me çfarë të ngushëllohet. /Liberale.al/
