Një anije peshkimi ka gjetur rreth 4 milje larg Durrësit trupin e pajetë të një burri. Nga këqyrja e kufomës rezulton se është e dekompozuar dhe mund të ketë kohë në det.
Trupi i pajetë u gjet i mbështjellë me letër natriban, ç’ka hedh dyshimet se mund të jetë vrarë dhe më pas është hedhur në det.
Peshkarexha “Emiliano” ka hedhur rrjetat për peshk, por në rrjeta ka rënë kufoma e një njeriu. Ekuipazhi i anijes së peshkimit ka njoftuar me radio policinë.
Policia Kufitare e ka transportuar në portin detar e më tej është dërguar në morg. Nga këqyrja paraprake, kufoma rezulton e dekompozuar dhe duhet të ketë disa muaj në det. Ende nuk dihet identiteti i viktimës dhe as shkaqet e vdekjes.
Njoftimi i policisë së Durrësit:
Më datë 18.08.2019, në orët e para të mëngjesit, një peshkarexhë që kishte dalë për gjueti të peshkut, rreth 4 milje larg Durrësit ka ngritur rrjetat dhe ka konstatuar në rrjeta një trup të pajetë të seksit mashkull.
Kufoma është transportuar në morgun e spitalit për ekspertizë mjeko-ligjore. Grupi hetimor nën drejtimin e Prokurorisë po vijon punën për sqarimin e rrethanave të ngjarjes.
