Zyra e prokurorit federal në Gjermani arrestoi një punonjës të ambasadës britanike në Berlin nën dyshimin për spiunazh për Rusinë.
David S. thuhet se i ka dorëzuar dokumentet një shërbimi sekret rus për para, siç njoftoi autoriteti në Karlsruhe të Mërkurën.
“Të paktën në një rast ai i përcolli dokumentet që kishte marrë gjatë aktivitetit të tij profesional tek një përfaqësues i një shërbimi inteligjent rus,” shkruan Prokuroria Federale. Në këmbim të dhënies së informacionit, i akuzuari mori para, por shuma nuk bëhet e ditur.
Arrestimi të martën në Potsdam ishte rezultat i hetimeve të përbashkëta nga autoritetet gjermane dhe britanike. Përveç kësaj, shtëpia dhe vendi i punës i burrit u kontrolluan.
Shtetasi britanik David S. kishte punuar si punonjës lokal në ambasadë deri në arrestimin e tij, tha Prokurori Federal. Thuhet se ai ka punuar për shërbimin inteligjent rus që nga nëntori 2020.
Gjykata Federale e Drejtësisë, do të vendosë për paraburgimin.
Autoritetet britanike konfirmuan arrestimin e një “personi që punonte si punonjës lokal për qeverinë”.
Ata nuk dhanë asnjë informacion shtesë, pasi sipas tyre çështja po hetohej.
