Ambasadori gjerman në Tiranë, Peter Zingraf mbështet zgjatjen e afatit të organeve të vettingut. Sipas tij, reforma në drejtësi është vendimtare për aspiratat e Shqipërisë lidhur me anëtarësimin në Bashkimin Evropian.
“Procesi i reformave në sektorin e drejtësisë është vendimtar për aspiratat e Shqipërisë lidhur me anëtarësimin në Bashkimin Evropian. Verifikimi i gjykatësve dhe prokurorëve është një element kyç në këtë kontekst. Ndaj për vendin është shumë e rëndësishme që mandati i institucioneve të pavarura dhe përgjegjëse të vetingut, i cili përfundon në qershor, të zgjatet, në mënyrë që procesi i verifikimit të përmbyllet sa më shpejt. Qeveria dhe opozita kanë përgjegjësinë e përbashkët për të rritur sundimin e ligjit duke u mundësuar kështu qytetareve dhe qytëtarëve shqiptarë të ecin më tej në rrugën drejt Bashkimit Evropian.“ shkruan ambasadori.
E të njëjtit mendim është edhe drejtoresha për Ballkanin në Ministrinë e Jashtme gjermane, Susanne Schütz, e cila ka shërbyer si ish ambasadore në vendin tonë. Ajo shkruan në Twitter, se është përgjegjësi e përbashkët e qeverisë dhe opozitës që të mundësojnë zgjatjen e mandatit.
“Reforma në drejtësi është një element vendimtar për rrugën e Shqipërisë drejt anëtarësimit në BE. Vettingu i gjyqtarëve dhe prokurorëve është kyç në këtë proces dhe duhet të përfundojë sa më shpejt të jetë e mundur. Është përgjegjësi e përbashkët e qeverisë dhe opozitës që të mundësojnë zgjatjen e mandatit”- thotë Susanne Schütz.