Gjykata e Krimeve të Rënda ka dënuar me 10 vite burg Klement Balilin, të cilësuar nga mediat greke si “Eskobari i Ballkanit”. Vendimi është dhënë mesditën e kësaj të marte. Prokuroria kërkoi 18 vite burg në total për Balilin, por pasi u dëgjuan edhe pretendimet e mbrojtjes, Gjykata e Krimeve të Rënda vendosi dënimin e tij me 15 vite burg.
Balili akuzohet për “mosdeklarim pasurie dhe fshehje pasurie“, “trafik droge” dhe “grup të strukturuar kriminal”. Balili përfitoi nga gjykimi i shkurtuar duke bërë që dënimi ndaj tij të ulet me 1/3.
“14 vite burg për akuzën e trafikut të lëndëve narkotike, 2.6 vite burg për akuzën e grupit kriminal, gjashtë muaj për fshehje pasurie dhe pesë vjet per pastrim parash. Ne total Klement Balili dënohet me 15 vite burgim dhe me aplikim të gjykimit të shkurtuar Balili dënohet me 10 vjet burgim”, u shpreh trupi gjykues, teksa lexonte vendimin.
Mbetet për t’u parë lëvizja e prokurorisë, pasi të ketë ankimuar në Apelin e Krimeve të Rënda vendimin e Shkallës së Parë. Klement Balili do vuajë dënimin në një burg të sigurisë së lartë. I ashtuquajtur “Eskobari i Ballkanit” u vetëdorëzua në Sarandë në 15 janar të këtij viti, pasi prokuroria çoi dosjen, në ngarkim të tij, për gjykim në Gjykatën e Krimeve të Rënda.
