Gramoz Ruçi jep dorëheqjen nga politika aktive dhe nga të gjitha funksionet drejtuese në PS. Ai thotë se deklaron fundin e maratonës politike prej 3 dekadash, teksa tha se i drejtohet moshës 70 vjeç.
“Dua të bëj një komunikim me ju. Kur unë nisa, rrugëtimin tim të kësaj maratone të gjatë prej 3 dekadash politike, 30-vjeçarët që janë në këtë Kongres s’kishin lindur akoma.
Kur nisa këtë rrugëtim 5-vjeçarët e 91-shit sot janë 35 vjeç. Kur unë nisa këtë rrugëtim, 10-vjeçarët janë 40 vjeç dhe janë me shumicë këtu. Kur unë nisa udhëtimin tim adoleshentët 15-vjeçarë janë 45 vjeç sot dhe janë bërthama e PS.
Natyrshëm gjatë këtij mandati që po përfundojmë me mua ka bashkëjetuar një pyetje; unë Gramoz Ruçi deklaroj fundin e maratonës politike, pasi çdo start ka dhe finishin.
Prandaj kam zgjedhur që s’ka më mirë se në këtë 30 vjetor të PS, s’ka më mirë që sot kemi fituar këtë mandat të tretë.
Pas disa muajsh mbush 70 vjeç që të deklaroj para jush se në 9 shtator që fillon legjislatura e re nuk do të ushtroj mandatin që më ka dhënë PS dhe se nuk do të kem ambicie për të qenë në asnjë organ ekzekutiv të familjes sime. Prandaj për ta mbyllur falënderoj Nanon dhe Ramën që e kam pasur privilegj të jem bashkëpunëtori i tyre. Të falenderoj të gjithë”, tha Ruçi.
