“Entuziazmi i njerëzve nuk mund të ndalet.”
E tillë ka qenë përgjigja e kryedemokratit Lulzim Basha ndaj kritikave të kryeministrit Edi Rama, se po zhvillon takime elektorale pa respektuar masat mbrojtëse anti –Covid.
Në një intervistë për ABC nga Gjirokastra, Basha tha se nuk mund të pranojë leksione nga një njeri që i karantinoi shqiptarët për dy muaj duke i futur në mjerim të dyfishtë ekonomik.
“Çdo aktivitet i imi ka prioritet shëndetin e njerëzve. Entuziazmi i njerëzve nuk mund të ndalet. Ka një hipokrizi nga kundërshtari që në kohë pandemie nuk ka bërë asgjë dhe i ka dhënë shqiptarëve paketën më të ulët ekonomike.
Tani që shikon zemëratën e njerëzve, kujtohet të bëjë të kujdesshmin. Parametrat e infektimit dhe fatalitetit janë shumë herë më të larta se në rajon. Kjo është arsyeja pse nuk kam organizuar asnjë miting.
Ata që marrin pjesë ju kërkoj të mbajnë distancë. Por, nuk mund të pranoj leksione nga një njeri që i karantinoi për dy muaj dhe i ka futur në një mjerim të dyfishtë”, – tha Basha.
