Në një intervistë mbrëmë për T7, ish-kryeministri i Kosovës, Ramush Haradinaj, ka treguar disa detaje të panjohura lidhur me raportet me Tiranën. Ai tha se në një moment ishte gati të shkonte të hiqte kufirin me Shqipërinë, por ka ndeshur në kundërshtinë e ish-ministrit të Brendshëm të qeverisë së Ramës, Sandër Lleshaj.
“Me Shqipërinë duhet bashkëpunim konkret. Të ikim kësaj idesë që të shkojmë t’i bëjmë disa lajme me një takim. Kufiri do të mbetet aty. A e dini pse nuk hiqet. Kam shkuar me bagera me e hek, ka ardhur Sandër Lleshi më ka thënë të lutem kryeministër mos na bëjë këtë. E pyeta pse? Sepse më tha se na ndalin liberalizimin e vizave dhe na ngujojnë përsëri. Nëse e do këtë atëherë vazhdo. Andaj ka mbetur ajo pikë kufitare aty”, tha Haradinaj.
Haradinaj shtoi më tej se me Shqipërinë duhet të lidhet marrëveshja e mbrojtjes së përbashkët.
“Kur kam dashur të dërgojë ushtrinë në Thumanë kur ndodhi tërmeti, vetëm unë e di sa dokumentet i kam nënshkruar dhe procedurat burokratike. Marrëveshje të përbashkët kanë edhe shtete krejt të ndryshme. Duhet t’i lëmë folkloret. Të punojmë që të bashkohem më shumë mes vete”, përfundoi ai.
