Komandoja i Navy Seal, që qëlloi për vdekje kryeterroristin Osama bin Laden, tha në një intervistë për Daily Mail se beson se biri i tij, Hamzai, fshihet diku në Pakistan. Ai tha se drejtuesi aktual i Al Kaedës mbrohet nga trafikantët e drogës. Megjithatë, Rob O’Neill tha se Hamzai duhet të frikësohet sepse do të ketë të njëjtin fund si babai.
Reagimi i tij vjen pasi qeveria amerikane deklaroi se ka vendosur një shumë prej 1 milionë dollarësh për informacione që do sjellin kapjen e Hamza bin Laden, që ka marrë përsipër organizatën terroriste.
“Më pëlqen fakti që Departamenti i Shtetit ka vendosur një shumë prej 1 milionë dollarë për kokën e tij. Megjithatë mendoj se ai vlen më shumë se aq. Mendoj se duheshin ofruar së paku 5 milionë”.
O’Neill ishte pjesë e SEAL Team 6 që sulmoi vilën ku jetonte Osama bin Laden në Pakistan rreth tetër vjet më parë. Historia e tij ka frymëzuar edhe filmin ‘Zero Dark Thirty’.
Në intervistë, ai ka dhënë sërish detaje nga sulmi që solli vrasjen e Osama bin Laden. Sipas tij, në materialet që kanë zbuluar në banesën ku u vra Osama bin Laden, gjendej edhe një letër ku inkurajohej Hamzai që të mos përfshihej në ‘biznesin e familjes’.
O’Neill beson megjithatë se fundi i Hamzait dihet. “Nuk jam i shqetësuar për të. Jam marrë me njerëz si ai. Ne kemi njerëz atje, më të rinj se unë e ndoshta më të mirë. Jamë shumë njerëz të zot që do e kryejnë misionin”.
