Kosovë – Kryeministri Avdullah Hoti deklaroi se vaksinimi kundër Covid-19 do të fillojë në shkurt, pasi në këtë muaj priten edhe dozat e para të vaksinës Pfizer.
Në një konferencë për mediat, Hoti tha se është përgatitur tashmë strategjia në bazë të së cilës përcaktohen qartë se kush do të vaksinohet fillimisht kundër Covid-19, teksa theksoi se pritet të vaksinohen në ditë rreth 20 mijë qytetarë.
“Sapo të na vijnë sasitë e vaksinave, do të kryhet vaksinimi i qytetarëve; fillimisht mjekë dhe stafi shëndetësor, personat mbi moshën 65 vjeç, dhe personat që kanë rrezikshmëri të lartë e cila përcaktohet nga lista e sëmundjeve”, – u shpreh Hoti. “Kapaciteti i institucioneve shëndetësore është të vaksinohen rreth 20 mijë qytetarë brenda dite”, – shtoi kryeministri kosovar.
Risjellim në vëmendje se dje Kosova arriti të sigurojë 500 mijë vaksina nga kompania Pfizer, dhe pritet të marrë edhe 360 mijë vaksina falas për 20% të popullatës nga kompania Covax.
