Dje pasdite kanë qarkulluar informacione dhe lajme në mediat e Kosovës, sikur Kryeministri Avdullah Hoti, është në prag të doreheqjes, për shkak të zhvillimeve të vështira politike atje, që lidhne me procesin e nisur në Hagë, apo zgjedhjen e Presidentit të ri, pas dorëheqjes së Thaçit.
Mirëpo, Hoti, sot paradite ka reaguar me një shënim në Facebook, ku hedh poshtë këtë teori.
“Informacionet të cilat po qarkullojnë nëpër media për dorëheqjen time janë të pa vërteta.
Me veprimet e mia kam dëshmuar gatishmëri e përkushtim për të ofruar zgjidhje për të gjitha çështjet e ngritura, duke zhbllokuar madje edhe proceset komplekse nëpër të cilat ka kaluar vendi siç ishte vendimi për vazhdimin e dialogut me parime dhe arritja e marrëveshje së 4 shtatorit në Uashington, hartimi i pakos emergjente dhe asaj për rimëkëmbje ekonomike dhe masat konkrete në menaxhimin e pandemisë Covid -19.
Sa i përket zhvillimeve të fundit pas veprimeve të Dhomave të Specializuara dhe dorëheqjes së ish Presidentit Thaçi, e kam bërë të qartë se partitë parlamentare i kanë dy opsione, të gjejnë zgjidhje për çështjen e Presidentit ose të dakordohen për datën e zgjedhjeve. Por, asnjëherë në asnjë kontekst nuk e kam përmendur dorëheqjen si opsion”, shkruan Hoti në Facebook.
