I gjithë populli “ushtar”. Mobilizimi, në rast gjendjeje të jashtëzakonshme Pavarësisht se Shqipëria është një vend anëtar i NATO-s, aleancës më të madhe ushtarake në botë, kjo nuk do të thotë se shqiptarët janë ndarë njëherë e mirë nga koha kur i gjithë populli konsiderohej ushtar.
Repartet ushtarake shqiptare bazohen sot te shërbimi me pagesë, ndërsa stërvitja e detyruar ushtarake, që njihej me emrin e huazuar nga rusishtja “zbor”, është hequr. Por sërish, përgjegjësia për mbrojtjen e vendit është detyrë e të gjithëve.
Qeveria “Rama”, nëpërmjet një vendimi ka miratuar “planin e mobilizimit të përgjithshëm, ose të pjesshëm, të burimeve njerëzore, gjatë periudhës për të cilën kërkohet vendosja e masave të jashtëzakonshme”.
Në këtë vendim parashikohet:
“Mobilizimi ushtarak është detyrim ligjor i shtetasve për të siguruar plotësimin e njësive e të reparteve të strukturave ushtarake me personel, gjatë periudhave në të cilat janë vendosur masa të jashtëzakonshme. Mobilizimi kryhet në bazë të situatave të veçanta dhe nevojave të Forcave të Armatosura”.
Vendimi parashikon edhe nevojat për rezervistë jashtë vendit.
“Forcat rezervë, të cilat thirren gjatë mobilizimit të përgjithshëm ose të pjesshëm, janë pjesë e Forcave të Armatosura, të cilat janë të gatshme për pjesëmarrje gjatë gjendjeve kur janë vendosur masa të jashtëzakonshme, si dhe për pjesëmarrje në misione/operacione në mbështetje të paqes, jashtë vendit”.
Ministria e Mbrojtjes, nëpërmjet Qendrës së Personel-Rekrutimit harton listën e personelit rezervë. Lista emërore e personelit rezervë bëhet në bazë të nevojave të Forcave të Armatosura, sipas specialiteteve e funksioneve.
/ Top Channel