Një nga lajmet kryesore të ditës në Greqi është vdekja e një 76-vjeçari në një nga spitalet Covid, pasi një pacient shqiptar rreth të 60-tave i hoqi tubin e oksigjenit, i shqetësuar nga zhurma.
Mjekët deklarojnë se gjendja e pacientit grek ishte stabilizuar kur papritur filloi të binte alarmi i pajisjes, duke treguar se ishte jashtë funksionit.
Pavarësisht ndërhyrjes së shpejtë, personeli mjekësor nuk arriti që ta mbante në jetë 76-vjeçarin.
Si u zbulua se pas krimit qëndronte shqiptari
Sipas raportit të hetimeve nga mediat greke, pacienti shqiptar është identifikuar nga gjurmët e gishtave në prizën e pajisjes së oksigjenit. Autori i krimit fillimisht mohoi çdo përfshirje, por policia sipas mediave i konsideron gjurmët prova të pakundërshtueshme.
Nuk vonoi e vërteta nga shqiptari, teksa u shpreh se prizën e hoqi pasi e shqetësonte zhurma e ventilatorit. Po sipas mediave, autori ka çrregullime të shëndetit mendor dhe neurologjik, të shkaktuara nga përdorimi i medikamenteve psikotrope, por edhe gjendjes së krijuar nga infektimi me Covid-19.
