Policia e Shtetit ka proceduar 8 persona për zjarrvënie. Nga 25 korriku, në gjithë vendin janë proceduar 47 autorë të dyshuar për zjarrvënie të qëllimshme.
Mirditë – Strukturat hetimore të Policisë Mirditë arrestuan në flagrancë shtetasin P.L., 66 vjeç, banues në fshatin Gjakëz. Ai ka ndezur zjarr në oborrin e banesës dhe zjarri ka dalë jashtë kontrollit duke djegur sipërfaqe të madhe me pyje dhe disa banesa të braktisura në fshatin Gjakëz, Mirditë.
Specialistët e Hetimit të Krimit në Komisariatin e Policisë Lezhë arrestuan në flagrancë shtetasin P. L., 52 vjeç, banues në Zejmen. Ai ka ndezur zjarr për djegien e mbeturinave, por zjarri i ka dalë jashtë kontrollit duke djegur një sipërfaqe të madhe barishte e kullota. Shërbimet e Policisë, në bashkëpunim me zjarrfikësen, kanë bërë të mundur shuarjen e flakëve, duke parandaluar përhapjen e zjarrit, i cili rrezikonte disa banesa dhe lokale, si dhe automjetet, pasi ishte anës rrugës kryesore në aksin Lezhë-Milot.
Specialistët e Hetimit të Krimeve në Komisariatin e Policisë Lezhë proceduan penalisht shtetasen Gj.V., 70 vjeçe, banuese në Balldre. Kjo shtetase, pasi ka ndezur zjarr në kanalin kullues, flakët kanë dalë jashtë kontrollit duke djegur një sipërfaqe me bimësi në fshatin Balldre.
Gjirokastër – Shërbimet e Postës së Policisë Dropull proceduan penalisht shtetasin V.O., banues në fshatin Radat, pasi gjatë kryerjes së disa punimeve me troho në bahçen e tij, ka shkaktuar zjarr dhe si pasojë e përhapjes së flakëve është djegur një sipërfaqe toke me bimësi në rrethinat e fshatit Radat.
Shërbimet e Stacionit të Policisë Memaliaj proceduan penalisht shtetasin M.B., 51 vjeç, banues në fshatin Memaliaj, pasi duke djegur disa barëra në pronën e tij, zjarri i ka dalë jashtë kontrollit dhe për pasojë është djegur një sipërfaqe toke me bimësi të ndryshme.
Berat – Në vijim të punës hetimore për zbulimin dhe vënien përpara përgjegjësisë ligjore të autorëve të zjarrvënieve, shërbimet e Komisariatit Policisë Berat proceduan penalisht shtetasin B.Sh., banues në Berat, pasi në lagjen “Donika Kastrioti”, ka shkaktuar zjarr nga pakujdesia dhe si pasojë e përhapjes së flakëve është djegur një sipërfaqe toke me barë.
U procedua penalisht shtetasi A.K., 28 vjeç, banues në Berat, pasi në vendin e quajtur ‘Mali Partizan’, ka shkaktuar zjarr nga pakujdesia duke hedhur një cigare të ndezur në tokë, për pasojë është djegur sipërfaqe toke me bimësi të ndryshme.
Korçë – Specialistët për Hetimin e Krimeve në Komisariatin e Policisë Korçë, bënë ndalimin e shtetasve A.Xh., 18 vjeç dhe T.B., 22 vjeç, banues në fshatin Gjonomadh, pasi dyshohet se tek vendi i quajtur “Korija e fshatit” në Gjonomadh, ata kanë djegur me zjarr një sipërfaqe pyjore me bimësi të ndryshme.
Policia e Shtetit apelon që në asnjë rast banorët mos shkaktojnë zjarrvënie, pasi do përballen me ligjin.
Ftohen qytetarët të denoncojnë në numrin 112 apo #KomisariatinDixhital çdo rast të zjarrvënies apo të paligjshmërisë në tërësi, duke garantuar anonimatin dhe reagim të shpejtë e të paanshëm!
LEXO EDHE:
Zjarret/ Ministria e Mbrojtjes: 6 vatra aktive, nuk rrezikohen banesat
