Nuk ka Juventus! Të paktën (besohet) se Zllatan Ibrahimoviç do ta kapërcejë edhe ndeshjen e madhe Milan-Juve, në program për t’u zhvilluar më 25 shkurt. Atë ditë, lojtari suedez do të mbarojë pezullimin prej tre ndeshjesh që ka marrë dje për shkak të kartonit të kuq që mori në minutën e 64-t të ndeshjes me Napolin. Një i kuq i nxjerrë nga gjyqtari Ricoli pas sugjerimit të vijërojtësit pasi Ibra kishte goditur me shuplakë mbrojtësin e kaltër Aronika. Sjellja, që u gjykua “e dhunshme” nga gjykatësi sportiv Xhampaolo Tosel, ka bërë që të nisë në mënyrë automatike dënimi për Ibrahimoviç, që do t’i shohë nga tribuna dy ndeshjet e radhës në transfertat e Udinezes dhe Çezenës. Në komunikatën e skualifikimit lexohet se Ibrahimoviç është ndëshkuar “pasi në minutën e 19-të të pjesës së dytë, me lojë të ndalur, ka goditur një futbollist kundërshtar me një shuplakë në fytyrë, shkelje që u vu re nga asistenti”.
Lëvizjet e Milanit
I menjëhershëm ka qenë reagimi i Milanit. Klubi kuqezi nuk priste tre ndeshje ndëshkim (pas ndeshjes Galiani ishte i sigurt: “Ibra nuk mund të dënohet më shumë se dy ndeshje”) ka gati apelimin: “A.C Milan komunikon se do të kundërshtojë vendimin e Gjykatësit Sportiv që e ka ndëshkuar të federuarin e tij, Zllatan Ibrahimoviç, me një skualifikim prej tri ndeshjesh kampionat”.
Precedenti
Apelimi i Milanit do të synojë, natyrisht, reduktimin e skualifikimit (duke kërkuar që të ndryshohet dënimi nga “i dhunshëm” në “antisportiv të rëndë”) në mënyrë që ta ketë Ibrahimoviçin në dispozicion në atë që mund të jetë ndeshja vendimtare në luftën për titullin kampion. Ka një precedent relativ për sezonin e shkuar që e bën Milanin të shpresojë. Kundër Barit, më 13 mars 2011, Ibrahimoviç goditi me grusht në stomak mbrojtësin Marko Rosi. Kartoni i kuq i kushtoi sulmuesit tre ndeshje (sjellje e dhunshme), që më pas u reduktua në dy ndeshje pezullim pas apelimit në Gjykatën Federale.
Jo provë TV për Aronikan
Nuk do të ketë provë TV (prokuroria federale nuk e ka kërkuar) për Salvatore Aronikan, mbrojtësi i Napolit, që pasi mori shuplakën e Ibrahimoviçit, reagoi duke goditur lehtazi Noçerinon.
Juventus
Marota e ka me gjyqtarët dhe… dënimin e Ibras
Gjithë sy e veshë janë nëTorino, ku presin me padurim për të mësuar se cili do të jetë fati përfundimtar për Ibran. Natyrisht, që dënimi prej 3 ndeshjesh është më se i merituar, por tifozëria bardhezi i druhet reduktimit, sidomos pas sigurisë që shfaqi administratori i Milanit, Galiani, që deklaroi se nuk priste më shumë se 2 ndeshje ndëshkim për sulmuesin suedez. Sidoqoftë, Drejtori i Sportiv i Juventusit, Bepe Marota, ka deklaruar se kjo situatë nuk i intereson. “Për atë që ndodhi në “San Siro”, nuk ndërhyj sepse nuk dua të futem në të tilla dinamika. Ne do ta përgatisim ndeshjen me Milanin sikur Ibra do të jetë në formacionin titullar. Më duhet të them se në të tilla raste, dënimet janë nga 2 në 3 ndeshje, por nuk do të bëjmë vlerësime pas kësaj. Gjykimi? Kam dashur vetëm të tërheq vëmendjen e arbitrave për më shumë kujdes në vendimet që marrim dhe besoj se kjo është detyra ime”, e mbylli Marota duke iu referuar penalltisë së pa dhënë në ndeshjen e fundit ndaj Sienës.
