Zllatko Daliç ka fansa të shumë edhe në Shqipëri. Në sezonin e 2008-2009 ka drejtuar Dinamon e Tiranës dhe tifozët e saj po e admirojnë duke e parë në televizori për atë që po bën në krye të Kroacisë. Dy fitore në dy ndeshje, por mbi të gjitha triumfi i bujshëm me Argjentinën e kanë bërë personazh në gjithë botën.
Ndihmësi i tij te Dinamo e asaj kohe, Ilir Bozhiqi, aktualisht përgatitësi i portierëve të Kombëtares dhe Skënderbeut, tregon për “Vipsport.al” çfarë trajneri dhe çfarë njeriu është Zllatko Daliç:
“Trajner me ide të qarta për atë që kërkon. Mjaft korrekt dhe shumë i edukuar. Bashkëpunimi ka qenë perfekt me ne si staf dhe gjithë të tjerët.
I kushtonte shumë rëndësi në punë e tij shtrirjes së ekipit në fushë, pra anës taktike.
Në atë kohë kujtoj që po i kushtonte shumë rëndësi mësimit të gjuhës angleze. Komunikimi me të ishte shumë i mirë, jo vetëm për ne që punonim me të, por për të gjithë. Është jashtëzakonisht i edukuar, prandaj e respektonin të gjithë.
Trajner mbrojtës apo sulmues? Kohët kanë ndryshuar. Punonte për mbrojtjen shumë, pa lënë mënjanë sulmin. Te Kroacia i ka të gjithë kualitetet për të bërë shkëlqyer, siç ka bërë në këto dy ndeshjet e para. Punon për çdo detaj, si në anën defensive, ashtu dhe ofensive”, – ka thënë ish-ndihmësi Zllatko Daliç te Dinamo e Tiranës, Ilir Bozhiqi. / Vipsport.al
