Kryetari i BD-së, Astrit Patozi ka sulmuar ashpër Partinë Demokratike pas incidentit në Shkodër, ku një i riu ofendoi Rudina Hajdarin. Patozi thotë se “ata e dinë opozitën si pronë private apo leje ndërtimi ndaj sillen si bisha të tërbuara”.
Statusi plotë
NUK KANË FAJ, E DINË QË OPOZITA ËSHTË PRONË OSE LEJE NDËRTIMI
Janë më shumë të marrë, se sa të poshtër, dhe për këtë nuk duhen marrë asnjëherë seriozisht.
Ata mendojnë se opozita është pronë, leje ndërtimi apo tender, që ka nevojë patjetër për firmën e tyre, sepse vetëm kështu e konceptojnë politikën dhe atë që vjen prej saj.Ndaj edhe mos u çudisni, kur të shikoni skena të neveritshme si ajo me atë trimin nga Shkodra, që i hakërrehej Rudina Hajdarit se përse ajo nuk e njihte tamam babain e vet, ashtu si ai vetë.
Në fakt është e vetmja gjë që u ka ngelur për të bërë, pas një serie të pashembullt revolucionesh të premtuara, të cilat, ose nuk kanë shpërthyer kurrë, ose kanë ngrënë bijtë e vet.Është një reagim i ngjashëm me ato bishat e uritura, të cilat në ruajtje të territorit, që u zvogëlohet përditë, shenjojnë duke përmjerur hapësirën e tyre, ku nuk duhet të shkelin të tjerët.
Në shqip mund të thuhet edhe “tokë e xanun”.
Paraditen e sotme, deputetja Hajdari teksa ndodhej në gjimnazin “Shejnaze Juka” në Shkodër, u vendos në shenjestër nga një djalë i ri, që në fillim u raportua se ishte nxënës i kësaj shkolle, por më pas u mësua se ishte anëtar i Forumit Rinor të PD-së. Fatjon Mani i tha znj. Hajdari se “ju jeni bërë shtojcë e Edi Ramës dhe nuk përfaqësoni popullin”. Sakaq, ajo reagoi me qetësi duke thënë se “politika nuk duhet të na përçajë por të na bashkojë”.
Lexo edhe:
Video/ I riu revoltohet me Rudinën: A e njeh ti Azem Hajdarin?!
