Kryeministri Edi Rama tha në konferencën e përbashkët me presidentin e Këshillit Europian, Charles Michel se, nuk do të ketë ndarje nga Maqedonia e Veriut në procesin e integrimit Europian, për aq kohë sa ka ende mundësi që Bullgaria të hapë rrugën.
“Ajo që ne do të bëjmë është ajo që thashë. Ne nuk kërkojmë të ndahemi nga Maqedonia e Veriut për sa kohë ka akoma hapësirë të mendohet se Bullgaria mund të hapë rrugën. Bëmë dhe një konsultim kombëtar ku përfshimë qytetarët e vendit për të dhënë opinion dhe ishin thuajse gjysmë milioni shqiptarë që u shprehën që nëse edhe me përmbylljen e Presidencës franceze kjo çështje nuk do të mbyllej, atëherë ne jemi në të drejtën tonë që të dalim nga rrezja e konfliktit që Bullgaria ka hapur me RMV dhe do t’i drejtohemi patjetër të gjithëve. Unë e kam parë të qartë që ky do jetë qëndrimi ynë, por deri në fund kur të bëhet mbledhja e Këshillit Europian, qëndrimi ynë është që të hapen negociatat për të dyja vendet”, tha Rama.
Më herët kreu i qeverisë shqiptare shprehu gatishmërinë për t’u ndarë nga Maqedonia e Veriut nëse Bullgaria nuk heq veton.
