Ardit Kërtusha, ish-kandidati për kreun e Partisë Socialiste në Durrës është plagosur me armë zjarri mesditën e sotme.
Ngjarja ka ndodhur në një lokal në zonën e plazhit në Durrës, i cili është në pronësi të reperit Rigels Rajku, i njohur me emrin e artit Noizy.
Sipas policisë ngjarja ka ndodhur pas një konflikti çasti, ndërkohë që pas plagosjes Kërtusha është dërguar në spitalin e Traumës në Tiranë, ku ndodhet në kujdesin e mjekëve jashtë rrezikut për jetën.
“Rreth orës 13:00, në lagjen nr.1 Durrës, dyshohet se gjatë një konflikti të çastit, për motive të dobëta, është plagosur me armë zjarri, në këmbë, shtetasi A. K., 31 vjeç, i cili ndodhet nën kujdesin e mjekëve, jashtë rrezikut për jetën”, thuhet në njoftimin e Policisë, duke shtuar se vijon krehja e zonës për kapjen e autorit.
Ardit Kërtusha kandidoi për kreun e Partisë Socialiste në Durrës në vitin 2020 dhe më pas u tërhoq nga gara.
Më herët Kërtusha ka qenë kryetar i FRESSH për qytetin e Durrësit dhe Drejtor i Drejtorisë së Planifikimit Strategjik dhe Jetësimit të Prioriteteve në Bashkinë e Tiranës.
