Rritja e inflacionit, në një treg normal, shoqërohet me uljen e papunësisë. Kjo nuk do të thotë se rritja e çmimeve është gjë e mirë për ekonominë. Norma e inflacionit duhet të jetë aq sa duhet të jetë, as e lartë dhe as e ulët, pra sa më optimale, ndërsa në Shqipëri për shumë arsye shpesh ekonomia nuk i përgjigjet ligjeve të tregut.
Zanatet më të kërkuara në tregun tonë të punës janë: kuzhinier, kamerier, parukier/berber, shitës, specialist i mësimdhënies, recepsionist, punonjës në ndërtim, bujqësi, miniera, transport etj. Bëhet fjalë për profesione që nuk kërkojnë aftësi intelektuale apo nivel të lartë arsimor. Prandaj edhe shprehja “punë ka por nuk ka profesionistë” i shkon për shtat atyre që nuk kanë arsimin e duhur, eksperiencën, apo edhe as dëshirën për të punuar në tregun vendas.
Ndërkohë për të njëjtat profesione ka nevojë dhe tregu i vendeve të BE-së, ndaj edhe kjo shpjegon largimin masiv të shqiptarëve për te gjetur punë në një vend të zhvilluar ku pagesa për të njëjtën punë mund të jetë nga 3 deri në 5 herë më e lartë.
Nga ana tjetër sektorët që kërkojnë më tepër punëtorë në vendin tonë janë: industria përpunuese, tregtia, akomodimi, ndërtimi, hoteleri-turizmi.
Duke iu referuar të dhënave zyrtare, mbi 76 mijë persona në Shqipëri janë të regjistruar si të papunë tek Agjencia Kombëtare e Punësimit. Aktualisht ka rreth 5 300 vende të lira pune.
Sipas Agjencisë Kombëtare të Punësimit problematike janë grup-moshat jo shumë të favorshme për punësim. Rreth 50% e punëkërkuesve të papunë janë të moshës mbi 45 vjeç.
“Është targeti më i vështirë për punësim. Përgjithësisht janë punëkërkues të papunë afatgjatë, janë ata persona që kanë mbi 1 vit të regjistruar në zyrën e punës, janë ata persona që e kanë të vështirë punësimin. Për ti integruar në tregun e punës ofrojmë programe me punësim part-time ndërkohë ata mund të formohen në një profesion më të ri, se ndoshta profesioni që kanë pasur mund të jetë vjetërsuar ose nuk kërkohet më në tregun e punës,” – u shpreh Gertiola Çepani, përgjegjëse e Shërbimit të Punësimit.
“Ndryshe janë vendet që shpallen nga punëdhënësi, ndryshe janë profesionet e dëshiruara që duan punëkërkuesit,” – u shpreh Çepani.
Shumica e të papunëve, sipas shifrave zyrtare janë nga Tirana, Elbasani, Fieri, Kukësi dhe Korça.
