Një alpinist britanik, që vdiq në Malin Everest, ishte shprehur i shqetësuar se trafiku i njerëzve në këtë mal po kthehej në shqetësim. Robin Haynes Fisher, 44 vjeç, vdiq në atë që njihet si ‘zona e vdekjes’, e famshme për nivelin e ulët të oksigjenit. Ai po zbriste pasi ishte ngjitur në malin më të lartë në botë.
Në një postim në median sociale, ai shkruante se problemet nga numri i madh i njerëzve, mund të jenë fatale.
“Vonesat nga mbingarkesa me njerëz mund të jenë fatale, ndaj shpresoj që vendimi për të shkuar për herë të 25-të do të thotë më pak njerëz”.
Fisher është një nga 10 njerëzit që kanë humbur jetën brenda 9 ditësh në një rrugë të mbushur me njerëz. Një numër rekord alpinistësh po ngjiten në majën e malit më të lartë në botë për shkak të motit të mirë pranveror.
Por autoritetet e turizmit në Nepal thonë se vdekjet në Everest nuk kanë ardhur për shkak të mbingarkesës njerëzore. Mes të tjerave, ata thonë se shkak është bërë moti i keq.
Një foto e njerëzve në radhë të gjatë për të ngjitur Everestin ka bërë xhiron e rrjetit së fundmi. Një guidë vendase tha se një prej alpinistëve vdiq nga lodhja për shkak se ngeci në trafik për më shumë se 12 orë.
Në total janë 41 skuadra me 378 alpinistë që kanë leje për të ngjitur malin gjatë sezonit pranveror. Po kaq është edhe numri i guidave nepaleze që i ndihmojnë për të dalë në majë.
Një nga kompanitë që sponsorizon ngjitjet në Everest tha se shumë prej atyre që vijnë aty nuk kanë pajisjet e duhura dhe praktikën e nevojshme.
