Kryeministri Edi Rama i është përgjigjur akuzave të kryedemokratit Lulzim Basha, i cili dje në një emision televiziv akuzoi qeverinë se po fsheh numrin real të të vdekurve nga koronavirusi.
Rama shkruan në Facebook se deklaratat e Bashës nuk e cenojnë integritetin moral e profesional të mjekëve. Rama thekson se ditën e nesërme do t’u drejtohet shqiptarëve me një mesazh të drejtpërdrejtë.
“Për akuzën e pashembullt të Lulëzim Bashës, e cila cënon drejtpërdrejtë integritetin moral e profesional të mjekëve të vijës së zjarrit dhe nxit dhunë ndaj tyre, do t’u drejtohem nesër shqiptarëve me një mesazh të drejtëpërdrejtë, sepse këtu është shkuar shumë shumë larg, përtej çdo caku të politikës së ulët ditore dhe këtu nuk është më fjala thjeshtë për llafet e një aktori të papërgjegjshëm!
Sot u shpreh të gjithë solidaritetin dhe mbështetjen time, profesoreshë Najada Çomos e të gjithë skuadrës së saj shembullore, duke u përulur me mirënjohje përpara stërmundimit të tyre të përditshëm prej nëntë muajsh me radhë, si edhe duke u thënë që historia e mjekësisë shqiptare do të flasë për ta kur Lulëzim Bashës e xhagajdurëve të tjerë të botës mizerabël të shpifjeve e të thashethemeve, t’u jetë harruar emri, nami e nishani!”, thuhet në reagimin e kryeministrit.
LEXO EDHE:
“Qeveria fsheh vdekjet nga COVID”/ Mjekët-Bashës: S’është e vërtetë, të hetohen kartelat mjekësore
