Kancelari gjerman Olaf Scholz ka deklaruar se do të udhëtojë në Ballkanin Perëndimor përpara se të mbahet një takim i Këshillit Evropian muajin e ardhshëm, duke përcjellë mesazhin se rajoni i përket Bashkimit Evropian.
Gjashtë vendet e Ballkanit Perëndimor me aspirata për anëtarësim në BE, Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia, janë angazhuar në procesin e reformave shumëvjeçare, u tha Scholz ligjvënësve në Berlin të enjten.
“Nderimi i angazhimeve tona ndaj tyre nuk është vetëm një çështje e besueshmërisë sonë. Sot më shumë se kurrë, integrimi i tyre është edhe në interesat tona strategjike”, tha ai, duke vënë në dukje ndikimin e “fuqive të jashtme” në rajon, përfshirë Rusinë.
Gjatë muajit prill, Scholz ka bërë thirrje që përpjekjet e vendeve të Ballkanit Perëndimor për t’u bashkuar me BE-në të përshpejtohen, në mes të një “epoke të re”, që vjen pas pushtimit rus të Ukrainës.
Në tetor të vitit të kaluar, liderët e BE-së në një samit në Slloveni përsëritën “angazhimin e tyre ndaj procesit të zgjerimit”, duke zhgënjyer gjashtë kandidatët për anëtarësim në BE, të cilët kishin shpresuar për një afat konkret.
Kancelari gjerman tha të enjten se do të marrë pjesë në samitin e BE-së në fund të majit qershor, “me mesazhin e qartë se Ballkani Perëndimor i përket Bashkimit Evropian”.
Më herët të enjten, Scholz tha se nuk ka “asnjë rrugë të shkurtër” për anëtarësimin e Ukrainës në BE, duke shtuar se një përjashtim për Kievin do të ishte i padrejtë për vendet e Ballkanit Perëndimor, që gjithashtu kërkojnë anëtarësim.
“Procesi i anëtarësimit nuk është një çështje e disa muajve apo viteve,” tha ai, duke sshtuar se blloku duhet të gjejë një mënyrë “të shpejtë dhe pragmatike” për të ndihmuar Kievin.
Ukraina ka bërë thirrje që statusi i saj kandidat në BE të shqyrtohet në mënyrë të përshpejtuar, pas pushtimit rus që ka shkatërruar vendin.
Emmanuel Macron, presidenti i Francës, ka thënë gjithashtu se do të duhen “dekada” që Ukraina të anëtarësohet në BE, ndërsa Presidenti ukrainas Volodymyr Zelenskyy e quajti këtë “të padrejtë”./Liberale.al
