Një 39-vjeçar është vendosur në pranga pasi ka kanosur dje me armë zjarri një person në një lokal në Babrru. Bëhet fjalë për Sokol Tanushi, 39 vjeç.
Mësohet se i riu ka kërcënuar me pistoletë pronarin e lokalit me inicialet P.Ll., nën efektin e alkoolit.
Nuk dihen ende motivet e konfliktit të agravuar, por policia bën me dije se gjatë kontrollit për gjetjen e armës rezultoi se pistoleta është marrë dhe fshehur nga i identifikuari me inicialet A.K., i pranishëm në vendngjarje.
Ai është shpallur në kërkim dhe po punohet për kapjen e tij.
Njoftimi i Policisë:
Specialistët për Hetimin e Krimit në Komisariatin e Policisë Nr. 5 bënë arrestimin në flagrancë të shtetasit S. T., 39 vjeç, pasi në Babrru ka kanosur me armë zjarri pistoletë shtetasin P. Ll. Gjatë kontrollit për gjetjen e armës nga veprimet hetimore rezultoi se arma e zjarrit është marrë dhe fshehur nga shtetasi A. K., i pranishëm në vendngjarje, i cili është shpallur në kërkim dhe po punohet për kapjen e tij.
