Një sasi e madhe kokaine është sekuestruar pasditen e sotme në Portin e Durrësit. Mësohet se janë sekuestruar rreth 100 kilogramë kokainë në një konteiner i cili vinte nga Ekuadori. Burime bëjnë me dije se ishin 200 pako me kokainë që u gjetën të fshehura në tavanin e konteinerit me banane
Ka qenë skaneri i kontrollit në Portin e Durrësit që ka bërë të mundur zbulimin e sasisë së drogës. Menjëherë pas kësaj, përfaqësues të Drejtorisë së Përgjithshme të Policisë shkuan në Port. Ngarkesa në koneiner ishte ngarkuar rreth 20 ditë më parë.
Mësohet se konteineri u përket disa personave nga Tirana, emri i të cilëve është i padëgjuar më parë për përfshirje në ndonjë vepër kriminale. Konteineri që vinte nga Ekuadori ishte i mbushur me banane dhe përdorej nga kompania Massabi Fruits me qendër në Kombinat Tiranë.
Kujtojmë se vetëm pak ditë më parë në Durrës, u kap një sasi tjetër prej 49 kg kokainë e fshehur në pjesën anësore të një konteineri me banane. Për këtë u arrestua Selim Çekaj, babai i Arbër Cekajt, edhe ky i fundit i arrestuar për një sasi të madhe kokaine të kapur në vitin 2018.