Kakavije-Ditën e diel strukturat e Policisë së Shtetit në Qarkun e Gjirokastrës, në Stacionin Kufitar të Kakavijes, kanë goditur një rast të trafikimit të lëndëve narkotike në drejtim të Greqisë me autobus udhëtarësh, ndërkohë që kanë ndaluar edhe shoferin e autobusit. Sipas burimeve zyrtare të policisë në Gjirokastër, orët e vona të ditës së shtunë duke u gdhirë dita e diel, efektivat e Policisë Kufitare të Kakavijes në bashkëpunim me specialistët e Sektorit Kundër Narkotikëve, në Drejtorinë e Policisë së Qarkut Gjirokastër kanë marrë informacion në rrugë operative se me një nga autobusët e linjës Shkodër-Athinë do të trafikohej një ngarkesë më lëndë narkotike në drejtim të Greqisë. Pas marrjes së këtij informacioni në Stacionin Kufitar të Kakavijes policia ka përforcuar shërbimet e kontrollit edhe me efektiva të antidrogës.“Gjatë gjithë mesnatës të së shtunës duke u gdhirë e diela ne ushtruam kontrolle të imtësishme në të gjithë autobusët e linjave ndërkombëtare Shqipëri-Greqi”, thonë burimet policore. Rreth mesnatës në doganën e Kakavijes ka mbërritur autobusi me targë TR 63 90 M, që drejtohej nga Selami Kalaja, 57 vjeç, lindur dhe banues në Tiranë. Edhe ky autobus i është nënshtruar kontrollit të rreptë të policisë, ku efektivat blu kanë ushtruar një kontroll të imtësishëm të të gjitha çantave dhe valixheve që ndodheshin në bagazhin e autobusit, në prani të çdo pasagjeri. Sipas burimeve policore, gjatë kontrollit, në njërën prej valixheve, e cila ishte pa kundrabiletë dhe nuk i përkiste asnjërit prej pasagjerëve, rezultoi se brenda saj, në fundin e valixhes, maskuar me rroba të brendshme femrash, ndodheshin 6 pako të mbështjella me letër alumin dhe natriban, ku brenda tyre kishte 6 kilogramë lëndë narkotike të llojit marijuanë. Pas gjetjes së lëndës narkotike punonjësit e Policisë Kufitare kanë shoqëruar shoferin e autobusit S.Kalaja, i cili i është nënshtruar hetimeve të mëtejshme. Gjatë veprimeve ligjore specialistët e Sektorit Kundër Narkotikëve, në Drejtorinë e Policisë së Qarkut Gjirokastër në bashkëpunim me specialistët e Sektorit Operacional, në Drejtorinë Rajonale të Kufirit dhe Migracionit konstatuan se valixhja në të cilën u gjet lënda narkotike i përkiste drejtuesit të autobusit, S. Kalaja. Mbështetur mbi provat e mbledhura policia ka bërë ndalimin e shoferit të autobusit për veprën penale të “trafikut ndërkombëtar të lëndëve narkotike”.
B.SH