Zbardhen detaje të reja nga operacioni ndërkombëtar antidrogë i koduar “Los Blancos”, ku u shkatërrua karteli më i madh shqipfolës i trafikut të kokainës.
Operacioni është shtrirë në 10 vende të ndryshme të botës, përfshirë edhe Shqipërinë, si në Itali, Belgjikë, Emiratet e Bashkuara Arabe, Gjermani, Greqi, Holandë, Rumani, Hungari dhe Ekuador.
I arrestuar është edhe Eldi Dizdari, një tjetër emër i njohur i botës së trafikut të kokainës. Ai u kap në Dubai.
Mësohet se në krye të kartelit më të madh shqiptar të trafikut të kokainës që u shkatërrua sot, qëndron Dritan Rexhepi, një emër jo pak i njohur për Shqipërisë që lidhet edhe me rrëmbimin dhe vrasjen e Jan Prengës.
Jan Prenga
Porosia për rrëmbimin e Jan Prengës më 17 janar në Kamëz, është dhënë nga Dritan Rexhepi nga Vlora, i cili është person në kërkim për vrasjen e dy efektivëve të policisë në Shqipëri, ndërkohë që aktualisht ndodhet në një burg të sigurisë së lartë në Quito të Ekuadorit, për trafik droge.
Dritan Rexhepi drejtonte nga qelia e burgut trafikun e drogës nga karteli më i madh shqiptar. Gjatë hetimeve dhe arrestimeve prej vitit 2015, janë sekuestruar 5 milionë euro cash dhe 4 ton kokainë e trafikuar nga Amerika Latine.
Droga e fortë transportohej nga “Kompania Bello” e cila ka për pronar një shqiptar dhe financohej nga grupe të rëndësishme të trafikantëve të drogës që veprojnë në të gjithë Europën.
