Detaje të reja mësohen rreth dramës së përdhunimit të një të miture 14 vjeçare në Kavajë. Kjo ngjarje pati gjithë vëmendjen e publikut këto dy ditë, dhe u mësua nga denoncimi i ish-kryeministrit Berisha. Të dhëna të reja tregojnë se ngjarja ka ndodhur në Nëntor të vitit të kaluar, por është mbajtur e fshehtë nga vajza për shkak të ndrydhjes prej ambjentit fanatik që ekziston në këtë qytet dhe prej presionit që bënin dhunuesit e saj, që e kërcënonin me publikim të videos.
Familja mësohet se ka tre vajza, dhe e dhunuara është më e madhja. Në pamundësi për të duruar më tej presionin, vajza i ka treguar mamasë së saj, edhe pse në shkollë tashmë e kishin marrë vesh shumë vetë. Babai i të miturës punon në Itali, por është kthyer menjëherë, pak ditë më parë, sapo ka mësuar çfarë ka ndodhur. Me të mbërritur, ai ka bërë denoncimin në polici bashkë me vajzën e tij. Gjykata e Durrësit ka dhënë sot masën e arrestit për 7 adoleshentë të përfshirë në ngjarje, ndërsa njëri është në kërkim.
Kjo ngjarje ka tronditur mbarë qytetin, dhe cdo banor i Kavajës pret të merren masa të ashpra për dhunuesit, dhe për ata që e dinin ngjarjen, dhe nuk reaguan, por tentuan ta mbajnë të fshehur./Gazeta Mapo/