Kryetari i PSD-së, Tom Doshi ka reaguar pas kërkesës së Partisë Demokratike ndaj KQZ-së për të mos e regjistruar në zgjedhje. Doshi i quan akuzat e PD-së si shpifje të pabaza pasi frikësohen nga humbja e zgjedhjeve.
“Duke u nisur nga shpifjet dhe akuzat e pabaza, nga frika e humbjes në zgjedhjet e 25 Prillit, sepse Partia Socialdemokrate e Shqipërisë do jetë faktor i rëndësishëm në politikën shqiptare, ju bëjmë me dije se jo vetëm kryetari i PSD-së, Z. Tom Doshi, por edhe të gjithë kandidatët në çdo qark të vendit janë konform ligjit! PSD njeh, respekton Kushtetutën e Shqipërisë dhe ligjet shqiptare!“, shprehet PSD.
PD kërkoi gjatë paradites së sotme që të mos e regjistronin Tom Doshin si kandidat në zgjedhje, pasi sipas demokratëve ai ishte subjekt i ligjit të dekriminalizimit.
“Partia Demokratike i bën thirrje Komisionit Qendror të Zgjedhjeve të mos e rregjistrojë Tom Doshin në zgjedhjet e 25 Prillit. Tom Doshi është subjekt i ligjit të dekriminalizimit dhe ai nuk mund të marrë pjesë në zgjedhje. Në kuptimin e ligjit të dekriminalizimit, neni 2, Tom Doshi ndalohet të kandidojë, pasi ai është i dëbuar nga Shtetet e Bashkuara të Amerikës.
Urdhri i Sekretarit Amerikan të Shtetit ia ndalon atij hyrjen në SHBA, duke përbërë shkak ligjor për ndalimin e kandidimit të Tom Doshit në zgjedhjet e 25 Prillit 2021. PD i bën thirrje KQZ të zbatojë ligjin dhe të marrë këtë vendim, në interesin më të mirë të vendit dhe qytetarëve shqiptarë”, theksoi PD.
Deklarata e demokratëve erdhi pas kërkesës së ambasadores amerikane Yuri Kim që Tom Doshi të mos kandidonte në zgjedhje. Megjithatë, ai e futi emrin dy ditë më parë si i pari i PSD-së në Tiranë dhe Shkodër.
LEXO EDHE:
PD thirrje KQZ-së: Mos e regjistroni Tom Doshin, është subjekt i dekriminalizimit
