Pasi publikoi dje në Kuvend disa pamje të kamerave të sigurisë marrë nga disa biznese në lidhje me atentatin ndaj prokurorit të Durrësit Arjan Ndoja, ku sipas tij dukej edhe autori pa kapele i cili nuk është arrestuar, SPAK ka thirrur deputetin e opozitës Halit Valteri.
Mësohet se Valteri do të dorëzojë në SPAK në orën 11:00 pamjet e videot që publikoi në sallën e Kuvendit. Deputeti opozitar tha dje se policia dhe prokuroria nuk i ka dhe nuk ka bërë as mundimin t’i sigurojë e hetojë.
“Ky me kapele gjendet, ky pa kapele nuk gjendet, nuk e gjeni sot se e keni karamelen në fyt, ju dhe ata që ju kanë sjellë këtu, pengohet zbardhja e ngjarjes. Nëse do keni vullnet për ta zbuluar bëjeni dhe jepini qetësinë atyre prindërve, nuk doni ta zbuloni se keni hall se pas tyre fshihen ata që ju komandojnë juve. Me vjen keq tua them, po më mirë jepni dorëheqjen sa mos të turpëroheni më. Se fole për shifrat e drogës, dhe kanë kapur më pak, kur të fillojë korrja nuk do dini ku të futni kokën, e ke të përfshirë të 12 drejtorët, po jua fshehin se ndoshta nuk keni marrë asnjë lekë, më dukesh burrë i mirë për tu përfshirë me këta maskarenjtë, po të përdornin, po bëjnë gjëra pas kurrizit, po fshehin vrasjen”– tha Valteri dje.
Në letrën drejtuar ambasadores së SHBA, Yuri Kim dhe kreut të deleagacioni të BE, Luigi Soreca, Genci Maloku, babai i Andi Malokut shprehte shqetësimin se policia nuk kishte arrestuar autorin tjetër të atentatit, i cili sipas tij është i indentifikuar.
Ai kërkon drejtësi për humbjen e djalit të tij dhe vënien përpara përgjegjësisë ligjore të autorëve të atentatit. Si autor të dyshuar të ngjarjes, policia ka arrestuar Redjan Rrajën, nipin e deputetit të PS, Rrahman Rraja.
