Pak orë pas lirimit nga paraburgimi, ish-deputeti i Partisë Demokratike, Klevis Balliu është kthyer sërish te “Astiri”, duke iu bashkuar protestës së banorëve. Mesditën e sotme Gjykata e Tiranës dha masën “detyrim paraqitje” për Balliun, i cili u prangos dy ditë më parë me akuzat për “Kundërshtim me dhunë të punonjësve të policisë”, “Prishje e qetësisë publike”, etj.
Klevis Balliu iu tha protestuesve se dy ditë burg janë pak për kauzën e tyre të drejtë. “Edi Rama nuk vjen dot për një takim në Unazës e Re. Ai s’ka bythë të prishë shtëpitë tuaja”, tha Balliu.
Ish-deputeti demokrat u kërkoi gjithë shqiptarëve të bashkohen në protestën e madhe të 11 Majit në Bulevardin Dëshmorët e Kombit. “Ne do të përballemi me këdo që tenton t’ju dhunojë ju”, vijoi ai. Ndërsa banorët që protestojnë prej 6 muajsh e pritën me entuziazëm Balliun duke shpërthyer në thirrje: “Klevis ti je hero, gjithë Unaza ty të do!”
