Presidenti Ilir Meta i kërkon Kuvendit në rrugë zyrtare të marrë për bazë opinionin e Komisionit të Venecias, rreth ndryshimeve në Kodin Zgjedhor.
Kreu i shtetit ka përpiluar një shkresë, përmes së cilës i mëshon qëndrimit të tij.
“Gjejmë rastin të përsërisim edhe një herë thirrjen e Presidentit të Republikës se, tashmë pas kthimit në Kuvend të ligjit nr. 118/ 2020, Kuvendi i Shqipërisë (duke filluar që nga komisionet përgjegjëse parlamentare) duhet ta rishqyrtojë këtë nismë nën dritën e arsyetimit të Dekretit nr.11797, datë 22.10.2020, dhe të rekomandimeve të pritshme të Komisionit të Venecias, i cili është investuar tashmë nga Presidenti i Republikës mbi këto çështje”, shkruhet në të.
Presidenti Ilir Meta iu drejtua Komisionit të Venecias të premten, për një “opinion urgjent” rreth ndryshimeve sipas tij të njëanshme në Kodin Zgjedhor.
Nga ana tjetër, kryeministri Edi Rama paraqitet deri më tani i palëkundur në qëndrim. Kreu i qeverisë vijon të shprehet se Kodi Zgjedhor do të miratohet në seancën e ardhshme plenare.
