Komisioni për inceneratorët njoftoi këtë të premte mbylljen e hetimit parlamentar. Kryetarja Tabaku deklaroi se raporti përfundimtar do të paraqitet më 7 mars, ku palët pritet të dalin me dy qëndrime të ndryshme.
Në ditën që i përfundon mandati, anëtarët e Komisionit Hetimor për Inceneratorët, u mblodhën këtë të premte, për të njoftuar mbylljen e hetimit 3 mujor për aferën e inceneratorëve.
Sipas kryetares Jorida Tabaku, komisioni faktoi pretendimet e Partisë Demokratike për ekzistencën e një afere korruptive pas së cilës fshihet vetë kryeministri.
“Mënyra si është proceduar, lidhja e këtyre kontratave, njohjet me ministrat, kontratat shtesë që kanë marrë këto kompani, favoret që kanë marrë këto persona dhe fakti që sot këto tre persona janë në kërkim, tregojnë lidhjen e drejtpërdrejt, implikimin e shtetit dhe mbështetjen e tij”, tha Tabaku.
Krejt e kundërt ishte qasja e mazhorancës, e cila nxjerr të tjera konkluzione nga hetimi i komisionit.
“Për asnjë monent, ky komision nuk e ndau hetimin parlamentar nga një hetim penal. U shfrytëzua për akuza të cilat i kemi konsideruar si akuza të ngritura sipas parimit, ta bëjmë sa më të madhe gënjeshtrën, që të kemi shanc të besohet sadopak”, tha deputetja e PS, Ermonela Felaj.
Qasjet e kundërta pritet të reflektohen dhe në raportin që do të paraqitet më 7 mars, ku siç u paralajmërua dhe nga Felaj e Tabaku, palët pritet të dalin me 2 materiale të ndryshme.
