Komisioni i Pavarur i Kualifikimit ka konfirmuar sot në detyrë gjyqtarin e Apelit për Krime të Rënda, Dhimitër Lara. Ai njihet ndryshe dhe si gjyqtari i “Hakmarrjes për Drejtësi”.
Ballafaqimi me KPK
Për rreth 1 orë, KPK-ja referoi rezultatet e hetimit për Larën, ndërsa i ngarkoi barrën e provës për disa pasaktësi në deklarimin e pasurisë, apartamentit dhe huave. Gjyqtari, i cili për rreth 14 vite ka qenë pjesë e Apelit të Krimeve të Rënda, u paraqit i vetëm para treshes në KPK, ndërsa nuk kishte zgjedhur të bënte mbrojtje të gjatë për konstatimet e Komisionit.
Në lidhje me kriterin e pasurisë, Inspektorati i Lartë i Deklarimit dhe Kontrollit të Pasurisë dhe Konfliktit të Interesit kishte dorëzuar një raport pozitiv për gjyqtarin. Ndërkohë, në lidhje me aftësitë profesionale, sipas raportit të KLD-së, por edhe verifikimeve të Komisionit, nuk kanë rezultuar problematika në pesë dosjet e shortuara dhe në ato tri të përzgjedhura nga vetë ai.
Relatorja u shpreh se nga 5 denoncime të kryera prej publikut, është veçuar një prej tyre që është kryer nga shtetasit Orik Shyti dhe Laert Shyti, që sipas tyre janë akuzuar padrejtësisht si anëtarë të organizatës “Hakmarrja për Drejtësi”. Gjyqtari Lara tha se nëse do të kthehej pas, nuk do bënte asgjë ndryshe.
Lexo edhe:
“Hakmarrja për Drejtësi” në Vetting, kërkon shkarkimin e gjyqtarit
