Prokuroria ka dalë në përfundimin se efektivi i forcave shqiponja me datë 8 dhjetor ka qëlluar me dashje Klodian Rashën.
Pas përfundimit të hetimeve, prokuroria sqaroi edhe dinamikën e ngjarjes së 8 dhjetorit në Laprakë, Tiranë.
Bëhet me dije, se fillimisht polici ka arritur të ndalojë dhe ta kapë për krahu të riun, por në një moment të caktuar ky i fundit është larguar, ndërsa polici ka nxjerrë armën dhe e ka qëlluar për vdekje.
Mësohet se Rasha nuk ka qenë i armatosur në ditën e ngjarjes dhe për më tepër një fakt të tillë e ka ditur edhe efektivi Nevaldo Hajdaraj, i cili qëlloi mbi të natën e 8 dhjetorit.
Prokuroria është e bindur në lidhje me këtë fakt, veçanërisht pas zbardhjes me detaje të pamjeve të kamerës së një garazhi aty pranë, nga ku është fiksuar e gjithë ngjarja.
Pamjet e të cilës tregojnë qartë se efektivi e ka kapur pikësëpari nga krahu 25-vjeçarin Rasha, një distancë e cila të lejonte lehtësisht për të parë nëse ai ishte i armatosur apo jo, por pavarësisht këtij fakti, në momentin kur i riu i ka rrëshkitur nga duart efektivit, ky i fundit e ka qëlluar atë.
Janë këto pamje, por edhe ekspertiza në vendin e ngjarjes që ka bindur akuzën se jemi përpara një vrasje me dashje, por pa ndonjë motiv të përcaktuar.
***
Në lidhje me armën e gjetur në vendin e ngjarjes, ekspertiza ka rezultuar se ajo nuk është përdorur në ndonjë ngjarje tjetër.
Gjithashtu, prokurorisë i ka ardhur edhe përgjigja nga eksperti gjerman, i cili u thirr nga pala shqiptare për të ndihmuar në lidhje me mbetjet e gjetura tek pistoleta.
Sipas tij, është e panevojshme dërgimi i mbetjeve në ndonjë laborator tjetër, pasi rezultati do të jetë i njëjtë me ekspertët shqiptar.
Nisur dhe nga kjo përgjigje organi i akuzës do të veçojë hetimin e saj nga dosja e cila tashmë ka përfunduar edhe me verifikimet e fundit nisur nga pretendimet se viktima dhe autori mund te kenë njohje të mëparshme mes tyre.
Përfundimisht prokuroria është e bindur që mes tyre nuk ka pasur njohje të mëparshme dhe gjithçka që ka ndodhur ka qenë ngjarje e momentit.
Efektivit do t’i komunikohet akuza e vrasjes me dashje dhe më pas dosja do t’i dërgohet gjykatës.
***
Kujtojmë se ministri Sandër Lleshaj dha dorëheqjen dy ditë pas vrasjes së 25-vjeçarit, ndërsa dhjetra të rinj kishin mbushur rrugët e kryeqytetit në shenjë revolte dhe indinjate për vrasjen e të riut.
Në një postim në Facebook, ku njoftoi për dorëheqjen e parevokueshme, Lleshaj tha se “vendi ka nevojë për një model të ndryshëm sjelljeje politike”.
Në rrugët e kryeqytetit të Shqipërisë, protestuesit u përplasën gati për 6 ditë me radhë me policinë, teksa kërkuan drejtësi për 25-vjeçarin e vrarë.
Policia hodhi gaz lotsjellës dhe ujë në drejtim të tyre.
Policia deklaroi se Klodian Rasha theu orën policore kundër pandemisë, si dhe ka qenë i armatosur dhe ka bërë disa lëvizje të dyshimta. Miq dhe familjarë të Rashës kanë thënë se ai nuk ka qenë i armatosur, ndërsa theksuan se i riu i kishte fobi ato. Sipas familjarëve, në dorë, Klodian Rasha ka pasur dy hurma nga oborri dhe asnjë send të paligjshëm.
