Imazhet e reja satelitore nga Koreja e Veriut tregojnë se është rindërtuar një vend për lëshimin e raketave, që ishte premtuar të shpërbëhej.
Imazhet u morën dy ditë pas bisedimeve midis udhëheqësve të SHBA-së dhe Koresë së Veriut, bisedime që përfunduan pa arritur një marrëveshje për denuklearizimin.
Faqja Tongchang-ri është përdorur për lançimin e satelitëve dhe testimin e motorit, por asnjëherë për nisjen e raketave balistike.
Puna për ta shpërbërë atë filloi vitin e kaluar, por u ndal kur bisedimet e SHBA u zvarritën. Premtimi për ta çmontuar atë ishte parë si një masë për ndërtimin e besimit midis Phenianit dhe Uashingtonit.
Ndërkohë, SHBA ka paralajmëruar se Koreja e Veriut mund të përballet me më shumë sanksione, nëse Pheniani nuk do të marrë hapa për denuklearizimin.
Provat satelitore, që vijnë nga disa “Think Tank” (trupa vëzhguese) të SHBA dhe dëshmi nga shërbimi i inteligjencës së Koresë së Jugut, duket se tregojnë përparim të shpejtë në rindërtimin e strukturave në bllokun e lëshimit të raketave në Sohae në Tongchang-ri.
Sohae ka qenë struktura kryesore e nisjes së satelitit të Koresë së Veriut që nga viti 2012. Ajo gjithashtu është përdorur për testimin e motorëve për raketat e afta për të arritur në SHBA.
Por, kurrë nuk është përdorur për të testuar raketat balistike që janë konsideruar aq provokative.
“Ky dallim është i rëndësishëm,” tha Jenny Town, redaktore drejtuese e grupit të monitorimit 38 North, për BBC.
“Koreano-veriorët ka gjasa ta shohin rindërtimin, jo si një pjesë aktive të programit të tyre të raketave, por të programit civil të tyre hapësinor. Një dallim që ata kanë bërë vazhdimisht në të kaluarën”, tha Town.
Ajo tha se rindërtimi i strukturave në vend mund të sinjalizonte një mungesë besimi në procesin e negociatave.
