Koreja e Jugut ka regjistruar sërish shkallën më të ulët të lindshmërisë në botë, me numrin që bie në një nivel të ri të ulët. Norma në vend ra për herë të parë më pak se një fëmijë për grua në vitin 2018.
Por të mërkurën, shifrat e publikuara nga qeveria treguan se shifra kishte rënë në 0.81 – tre pikë më pak se një vit më parë, dhe një rënie e gjashtë radhazi. Në krahasim, norma mesatare në ekonomitë më të përparuara të botës është 1.6 fëmijë.
Vendeve u duhen të paktën dy fëmijë për çift – një normë 2.1 – për të mbajtur popullsinë e tyre në të njëjtën madhësi, pa migrim. Normat e fertilitetit kanë “rënie të dukshme” në gjashtë dekadat e fundit thotë OECD – Organizata për Bashkëpunim dhe Zhvillim Ekonomik.
Por tendenca ka qenë veçanërisht e theksuar në Korenë e Jugut, ku madhësia e familjeve është zvogëluar në harkun e disa brezave. Në fillim të viteve 1970, gratë kishin mesatarisht katër fëmijë. Një popullsi në rënie mund të vërë një vend nën një tendosje të madhe. Përveç rritjes së presionit mbi shpenzimet publike ndërsa kërkesa për sisteme të kujdesit shëndetësor dhe pensione rritet, një rënie e popullsisë së të rinjve çon gjithashtu në mungesa të fuqisë punëtore që ndikojnë në ekonomi.
Në vitin 2020 pati një alarm të përhapur në Korenë e Jugut, kur regjistroi më shumë vdekje sesa lindje për herë të parë. Në vitet e fundit, presionet ekonomike dhe faktorët e karrierës kanë qenë konsideratat kryesore për njerëzit që vendosin për fëmijët, thonë ekspertët.
Për shifrat e vitit 2021, ekspertët përmendën kostot më të larta të jetesës, një rritje të çmimeve të banesave dhe ndikimin e pandemisë Covid si faktorë që i dekurajojnë ata që të kenë fëmijë. Një krizë po krijohet. Nëse popullsia e Koresë së Jugut vazhdon të zvogëlohet, nuk do të ketë mjaft njerëz për të rritur ekonominë e saj, për t’u kujdesur për popullsinë e saj të plakur dhe për të rekrutuar në ushtrinë e saj.
Politikanët e dinë prej vitesh se kjo po vjen, por nuk kanë mundur ta rregullojnë atë. Ata kanë hedhur miliarda dollarë në përpjekje për të bindur njerëzit që të kenë fëmijë, dhe ende nuk ka funksionuar.
Paratë sigurisht që janë një faktor. Rritja e fëmijëve në Korenë e Jugut është e shtrenjtë, dhe shumë të rinj po zhyten nën kostot astronomike të strehimit. Por kjo ka të bëjë edhe me mundësinë.
Gratë në Korenë e Jugut janë shumë të arsimuara, por nuk janë të barabarta në vendin e punës. Vendi ka hendekun më të lartë të pagave gjinore nga çdo vend i pasur. Shumica e punëve të shtëpisë dhe kujdesit për fëmijët në Korenë e Jugut ende i takon grave, dhe është e zakonshme që gratë të ndërpresin punën pasi kanë fëmijë ose që karriera e tyre të ngecë.
Në thelb, shumë gra janë ende të detyruara të zgjedhin mes të pasurit karrierë dhe familjes. Gjithnjë e më shumë ato po vendosin se nuk duan të sakrifikojnë karrierën e tyre.
