1,794,862 qytetarë kosovarë me të drejtë vote, do të vendosin sot për qeverinë e re.
888 qendra votimi janë hapur prej orës 07:00 në të gjithë vendin, dhe do të mbyllen në orën 19:00 për zgjedhjen e 120 deputetëve të Kuvendit të Kosovës.
E para që votoi ishte Kryetarja e Komisionit Qendror të Zgjedhjeve, Valdete Daka. Ajo i bëri thirrje qytetarëve të ushtrojnë të drejtën e votës duke respektuar masat anti-Covid.
“Unë porsa e kryva obligimin tim . SI kryetare mund të konfirmoj se KQZ-ja ka përfunduar të gjitha përgatitjet për këtë ditë. Sot KQZ-ja do të bëjë monitorimin e mbarëvajtjeve të zgjedhjeve. Ftoj qytetarët të respektojnë të gjitha rregullat e pandemisë dhe ta ushtrojnë të drejtën kushtetuese. I ftoj të gjitha subjektet politike që gjatë ditës të respektojnë të gjitha rregullat e KQZ-së”, – tha Daka.
Në këto zgjedhje të parakohshme parlamentare marrin pjesë 28 subjekte politike, prej tyre, 21 parti, 2 koalicione dhe 5 iniciativa qytetare.
Zgjedhjet parlamentare në Kosovë do të mbahen pa ndihmën e OSBE-së, ndryshe nga çdo herë tjetër, e cila ka qenë e pranishme në zgjedhjet lokale prej vitit 2013, për shkak të pandemisë Covid-19.
Mirëpo, stafi i ambasadave dhe vet ambasadorët janë zotuar se do jenë vëzhguesit e procesit të zgjedhjeve, krahas organizatave jo-qeveritare të Kosovës.
Prokuroria e Shtetit ka caktuar 88 prokurorë, bashkë me 40 zyrtarë nga sistemi prokurorial, që së bashku me Policinë e Kosovës, do të mbikëqyrin parregullsitë përgjatë procesit zgjedhor.
Votimi përmes postës nga diaspora ka filluar më 2 shkurt, teksa fletëvotimet janë pranuar nga KQZ-ja më 12 shkurt. Dje janë pranuar nga ky komision 16 mijë pako me vota nga diaspora.
Risjellim në vëmendje se për krijimin e qeverisë së re duhen 61 mandate.
Përse erdhën këto zgjedhje të parakohshme në Kosovë?
Pas një kërkese-padie, nga kreu i partisë Lëvizje Vetëvendosje, Albin Kurti lidhur me votën e deputetit, Etem Aridi e cila ishte vendimtare për krijimin e Qeverisë së drejtuar nga Avdullah Hoti, Gjykata Kushtetuese e Republikë së Kosovës, e shpalli atë të pavlefshme.
Kjo u bazua në argumentin se nuk kishte legjitimitet për të votuar pasi ai është dënuar më parë me vendim të formës së prerë nga Gjykata dhe një gjë e tillë në bazë të Kushtetutës kosovare është e ndaluar.
Si pasojë, presidentja në detyrë Vjosa Osmani, pas vendimit të formës së prerë shpërndau parlamentin dhe caktoi datën e re të zgjedhjeve, 14 shkurtin.
