Ambasada e Shteteve të Bashkuara të Amerikës në Kosovë reagon pas rrëzimit të qeverisë, duke i bërë thirrje partive politike që ta respektojnë vendimin e Gjykatës Kushtetuese.
Ambasada amerikane ka kërkuar që të sigurohen zgjedhje të lira, të drejta dhe paqësore.
“Shtetet e Bashkuara iu bëjnë thirrje të gjitha partive politike dhe institucioneve në Kosovë të respektojnë vendimet e Gjykatës Kushtetuese dhe të sigurojnë që qytetarët e Kosovës të kenë mundësinë të zgjedhin përfaqësuesit e tyre përmes zgjedhjeve të lira, të drejta dhe paqësore”, thuhet në komunikatën e Ambasadës.
Të hënën në mbrëmje, Qeveria e Kosovës u rrëzua pas një aktgjykimi të Gjykatës Kushtetuese, të bazuar në pavlefshmërinë e votës së Etem Arifit.
Arifi u dënua me 1 vit e 3 muaj burgim nga Gjykata e Apelit për mashtrim me subvencione, dhe pavarësisht kësaj ai votoi më 3 qershor pro qeverisë Hoti.
Kërkesa në Kushtetuese u dërgua nga Lëvizja Vetëvendosje.
