Komisioni i Pavarur i Kualifikimit shkarkoi sot nga detyra gjyqtarin e Gjirokastrës, Guximtar Boci.
Gjyqtari nuk kaloi asnjë nga kriteret e vlerësimit, atë moral, profesional dhe të pasurisë.
Gjyqtari Boçi ishte pezulluar prej vitit 2016 pas publikimit të një audio-skandali dhe u përball të mërkurën më 4 maj me Komisionin e Pavarur të Kualifikimit, KPK, ku gjatë seancës dëgjimore dha shpjegime më së shumti për audio-regjistrimin dhe për një apartament në Tiranë në pronësi të bashkëshortes, pasuri për të cilën ajo deklaron se gjysmën e zotëron të trashëguar nga babai i saj i ndjerë.
Guximtar Boçi e ka nisur karrierën e tij në sistemin e drejtësisë në vitin 1996 dhe ka punuar si gjyqtar dhe kryetar gjykate në Gjirokastër.
Në vitin 2016, Këshilli i Lartë i Drejtësisë, KLD e shkarkoi Boçin nga detyra e kryetarit të Gjykatës dhe e pezulloi atë si gjyqtar, pas publikimit të një audioje në emisionin “Stop”, ku ai akuzohej se kërkoi favore seksuale në këmbim të një vendimi gjyqësor.
Në vitin 2017, prokuroria e pushoi procedimin penal ndaj Boçit dhe një vit më vonë ai fitoi pafajësinë me vendim të Gjykatës së Apelit të Vlorës. Boçi ka kërkuar prej asaj kohe rikthimin në sistemin gjyqësor, por Këshilli i Lartë Gjyqësor i ka rrëzuar kërkesat e tij.
Edhe gjatë seancës së mërkurë, relatori Lulzim Hamitaj konstatoi pezullimin e Boçit si gjyqtar dhe vërejti denoncimet e bërë publike ndaj tij. KPK vendosi sot për shkarkimin e tij nga sistemi i drejtësisë.
