Në një kohë kur janë shtuar zërat e ndërkombëtarëve për një dialog mes palëve, ambasadori britanik Duncan Norman ka mbërritur sot në selinë blu ku po mban një takim me kryedemokratin Lulzim Basha. Në qendër të takimit do të jetë padyshim rruga për të dalë nga kriza politike, e prodhuar që pas djegies së mandateve të opozitës, ndërsa nuk mund të kalojnë pa vëmendje as zgjedhjet lokale që janë planifikuar që të mbahen në 30 qershor.
Ndërkohë Partia Demokratike ka mbledhur kryesinë.
Në këtë mbledhje, kryetari i PD, Lulzim Basha, i propozoi kryesisë marrjen e 3 vendimeve të rëndësishme.
1. Partia Demokratike e Shqipërisë të regjistrohet në zgjedhje vetëm pasi të jenë krijuar kushtet për zgjedhje të lira dhe të ndershme. Situata aktuale politike në Shqipërisë, nuk mundëson standardet demokratike për zgjedhje të lira dhe të ndershme. Është provuar se Qeveria e Edi Ramës ka bashkëpunuar me krimin e organizuar për blerjen e votave.
2. Partia Demokratike e Shqipërisë të mos lejojë mbajtjen e zgjedhjeve fasadë, që shkatërrojnë demokracinë dhe vullnetin e qytetarëve shqiptarë.
3. Të mandatojë Kryetarin e Partisë dhe Sekretarin e Përgjithshëm për të negociuar me partitë politike të opozitës marrëveshjen për garantimin e zgjedhjeve të lira dhe të ndershme, mbrojtjen e interesit publik dhe formalizimin e aksionin opozitar për arritjen e këtyre qëllimeve.
Etiketa: ambasadori britanik, Kriza, kryesia, Lulzim Basha, opozita, propozimet, takimet
