Kryeministri Edi Rama zhvilloi sot në Kukës një takim me mbështetës në qytetin verilindor, në kuadër të turit “Bashkia që duam”. Sipas raportimeve Rama ka shkuar në Kukës me helikopter pasi protestues të opozitës i bllokuan rrugën në hyrje të qytetit. Kreu i qeverisë foli për investimet e qeverisë për bërjen funksionale të aeroportit në Kukës, ndërtimin e stadiumit të futbollit, dhe nuk la pa prezantuar kandidatin e PS për kryetar bashkie, Safet Gjicin.
Ndër të tjera nëpërmjet një deklarate për mediat kryetari i Bashkisë Kukës, Bashkim Shehu shprehet se janë pro investimeve në aeroportin e Kukësit, por Edi Rama duhet të largohet pasi sipas tij ai nuk përfaqëson më qytetarët por përfaqëson vetëm bandat e krimit ku ai është totalisht i përfshirë.
“Kryeministri vazhdon me shprehjen e tij të famshme që ne jemi barbarë, madje se jemi dhe derra, por ai nuk e di se derrat nuk janë rritur ndonjëherë në Kukës. Jemi të hapur për investime në aeroportin e Kukësit por duam që të ngrihet një komision ku të ketë përfaqësues të bashkisë, përfaqësues të koncesionit dhe të shikohet ky aeroport që është pronë e kuksianëve, është dhuratë e Kukësit. Jemi kundër grabitjes së pronave të Kuksianëve. I bëj thirrje Edi Ramës të largohet një orë e më parë, të ikë me qetësinë më të madhe pasi në çdo dalje që ai bën, tregon që nuk përfaqëson qytetarët, por përfaqëson bandat e krimit”.-shprehet Shehu.
Ndiqni deklaratën e plotë në videon më poshtë:
