Sekretari i Përgjithshëm i PD, Gazment Bardhi ka reaguar pas raportit të Prokurorisë së Përgjithshme, ku Njësia e Dekriminalizimit konfirmoi se kryebashkiaku i Mallakastrës, Qerim Ismailaj preket nga dekriminalizimi.
Përmes një deklarate për mediat, Bardhi tha se Prokuroria vërtetoi qëndrimin e PD, e cila kërkoi shkarkimin e Ismailajt pasi kishte gënjyer në formularin e vetëdeklarimit, duke fshehur dënimin me tre vite burg në Greqi.
“Sot kemi një lajm të mirë! Një tjetër burgaxhi i Edi Ramës do të largohet nga qeverisja. Megjithëse me 1 vit e gjysëm vonesë, u provua vërtetësia e qendrimit të Partisë Demokratike se Kryebashkiaku ilegjitim i Mallakastrës, Qerim Ismailaj, është i dënuar me burg në Greqi dhe se ai e ka fshehur këtë fakt në formularin e dekriminalizimit.
Qerim Ismailaj është produkt politik i Edi Ramës, njësoj si mbi 20 kriminelë të tjerë që ai i futi në parlament, i emëroi në bashki dhe vazhdon me ta bashkëqeverisjen për të vjedhur pasuritë e shqiptarëve dhe bashkë me to, edhe votën e tyre.
Megjithatë, përballë të vërtetës, Edi Rama është i pafuqishëm për të mbrojtur kriminelët që e sollën në pushtet. Herët apo vonë, edhe ai vetë do të përballet me drejtësinë! E vërteta vonon, por nuk harron!“, u shpreh Bardhi.
Prokuroria ka përfunduar procesin e verifikimit për kryebashkiakun socialist të Mallakastrës, Qerim Ismailaj, i cili rezulton që të jetë i dënuar me 3 vite burg në Greqi. Ndërsa këtë dënim nuk e ka deklaruar në formularin e dorëzuar në KQZ. Qerim Ismailaj rrezikon të ketë fatin e Valdrin Pjetrit dhe Agim Kajmakut, të cilët u dogjën nga dekriminalizimi, për shkak të dënimeve në shtetet e tjera.
LEXO EDHE:
Prokuroria: Kryebashkiaku i Mallakastrës fshehu dënimin me 3 vite burg në Greqi