Ministrja e Shëndetësisë, Ogerta Manastirliu deklaroi sot në mbledhjen me Komitetin Teknik të Ekspertëve, disa ndryshime në protokollin mbrojtës anti-Covid.
Ora e lejuar e qarkullimit do të zgjatet me dy orë; duke filluar prej ditës së hënë (12 prill) qytetarët do të lëvizin lirisht nga ora 06:00 deri në 22:00 të mbrëmjes. Kjo fashë orari do të aplikohet edhe për aktivitetin e bareve dhe restoranteve, theksoi Manastirliu.
Nga data 12 prill gjithashtu do të rinisin udhëtimet me Britaninë e Madhe, nisur nga ecuria e këtij shteti në procesin e vaksinimit.
“Në vlerësim të situatës së 6 javëve të fundit Komiteti Teknik i Ekspertëve ka vendosur zgjatjen e orës së lejuar të qarkullimit të qytetarëve deri në orën 22:00 të mbrëmjes duke filluar nga dita e nesërme data 12 Prill. Po kështu aktiviteti i bareve dhe restoranteve. Do të vijojë të mbeten në fuqi të gjitha masat e orës police nga ora 22:00- 06:00 të mengjesit.
Impakti i lehtësimit të mësipërm do të monitorohet në vazhdimësi nga Komiteti Teknik i Ekspertëve për një periudhë dy javore. Gjithashtu duke marrë në konsideratë përmirësimin e ndjeshëm të situatës së epidemisë në Mbretërinë e Bashkuar, një shtet i cili ka pasur një ecuri shembullore sa i përket vaksinimit, që është pasqyruar me rënien e ndjeshme të të shtruarve në spitale dhe fataliteteve. Komiteti Teknik i Ekspertëve ka propozuar rihapjen e fluturimeve me këtë shtet”, – tha ministrja Manastirliu.
Sa i takon mësimit online, do të vijojë si për arsimin parauniversitar dhe universitar, duke përjashtuar maturantët.
Manastirliu mëshoi se ndryshimet lehtësuese në masat anti-Covid po vijojnë si rezultat i rasteve në rënie, ndërsa u bëri apel qytetarëve të vijojnë zbatimin e tyre.
Vendimet e marra në kuadër të luftës ndaj pandemisë Covid-19, do të jenë në fuqi për dy javët e ardhshme.