Bardhok Pllanaj, i arrestuar dy ditë më parë, është dërguar në spitalin e Shkodrës pas komplikacioneve në zemër. Ai ndodhet në reanimacionin e Spitalit të Shkodrës, ndërkohë që pritet që edhe masa e arrestit ndaj tij të zhvillohet në ambientet e spitalit.
Burime thonë se ai ruhet nga forcat e policisë, ndërsa masa ndaj është parashikuar për diten e sotme.
Policia në bashkëpunim me Prokurorinë e Rrethit Gjyqësor Shkodër, pas një hetimi disamujor, bënë të mundur dokumentimin e aktivitetit kriminal të shtetasit Bardhok Pllanaj, i cili prej disa vitesh kishte filluar ndërtimin për qëllime përfitimi të një objekti 10-katësh pa u paisur me lejet përkatëse të lëshuara nga organet kopetente.
Gjatë hetimeve të kryera ka rezultuar se ky objekt është financuar nga të ardhura që dyshohet që kanë ardhur si rrjedhojë e aktivitetit kriminal që ka kryer ky shtetas më parë, e për këtë arsye është vendosur dhe masa e sigurimit pasuror me vendim gjykate “Sekuestro preventive”, në bazë të Urdhrit të Ekzekutimit Vendimit Penal nr.1169 datë 29.11.2018, për objektin 10- katësh që ndodhet në qytetin e Shkodrës në pronësi të tij, objekt i cili kap vlerën 2 milion euro.
Një raport konfidencial i prokurorisë tregon se Bardhok Pllanaj, i dyshuari për trafikimin e 800 kg kanabis nga laguna e Vilunit, u ndalua nga policia më 29 shtator 2014 në Velipojë dhe u shoqërua në Drejtorinë e Policisë Shkodër. Ai u la i lirë po atë ditë, pasi nuk iu gjet lëndë narkotike. Një ditë më pas, sipas policisë ai u strehua në makinën e deputetit Mark Frroku, të cilën nuk mundën ta kontrollonin.
