Aktualitet

“Kur gishti tregon hënën, budallai shikon gishtin”














Bëni LIKE faqen zyrtare në Facebook
               Publikuar në : 10:06 - 20/04/21 |
Sokol Shameti

1-Një media e lirë akuzohet sot se ka treguar hënën. Ekspozimi dhe kompromentimi i të dhënave personale të të gjithëve ne, një akt përmasën e të cilit ende nuk po e rrokim siç duhet, u denoncua nga Lapsi.al ndaj të cilit sot është vërsulur në mënyrë idioteske ajo që pritej të dëshmohej si një nivel më i lartë ndërgjegjeje e zotësie: drejtësia “e re”, “e pavarur” dhe “profesionale”.





2- Edhe pse profilet tona u përfshinë disa ditë nga rrëfenja spektakolare e patronazhistit spiun që survejon dhe raporton mbi jetën e gjithsecilit, kjo është vetëm maja e ajsbergut. Shteti dhe partitë politike janë të ndara në demokraci. Një parti nuk ka punë të përdorë shtetin me qëllim përjetësimin e pushtetit të saj. Shtetit ia japim të dhënat tona që t’i ruajë e jo t’ia japë partisë së radhës në pushtet që t’i përdorë për të na “përpunuar” si zgjedhës potencialë. Nëse kjo ndodh, atëherë zyra shtetërore që na ka “shitur” dhe partia, kompania apo individi që na ka “blerë” duhet të përgjigjen para një drejtësie të re, të pavarur e profesionale.


3- Disa njerëz e konsiderojnë gjë pa zarar t’u kenë dalë në xhiro numri personal, kodi i banesës, numri i telefonit e të dhëna të tjera sensitive. Me kaq të dhëna në dorë dikush mund të marrë kredi në emrin tuaj nga banka e t’ju lërë ju kreditorë, mund të marrë numër telefoni nga një operator e ta përdorë për shumëçka, mund të fshehë identitetin e tij pas tuajit duke u shtirur si ju, mund të falsifikojë lirisht dokumentat tuaja e të angazhohet në kriminalitet apo terrorizëm duke ju shndërruar ju në person në kërkim. Mund të votojë në emrin tuaj e mund të kryejë çdo lloj veprimi tjetër juridik e tregtar. Pra, kur të dhënat tuaja dalin sheshit është një krim për të cilin duhet që dikush të mbajë përgjegjësi.





4- Shteti është vetëm një depozitë, një bankë që ka në ruajtje të dhënat e tua. I zoti i tyre, ashtu si i parave të depozituara në bankë, je ti. Nëse ti nuk jep leje ME SHKRIM që të dhënat e tua të dalin nga kjo “depozitë” e të përdoren për një veprimtari të miratuar nga ti, nuk ka asnjë mënyrë tjetër të ligjshme sesi ato të nxirren prej andej. Nëse kjo ndodh pa lejen tënde me shkrim, ti ke të drejtë padie dhe dëmshpërblimi të majmë.



5- Unë personalisht NUK kam dhënë leje me shkrim që të dhënat e mia t’u jepen në përdorim partive politike për qëllime elektorale. Asnjë partie. Sikurse kam raportuar më herët nuk jam kontaktuar as fizikisht e as me telefon nga ndonjë punonjës partiak a patronazhist të cilit unë t’i kem besuar pastaj me vullnet të lirë të dhënat e mia që ai të shkojë e të raportojë bindjet e mia politike.


Ky krim masiv ndaj publikut dhe secilit individ që përbën publikun, duhet të ndëshkohet. Denoncuesit e tij nuk duhen përndjekur por përkrahur.

1


Etiketa: , , ,

CLOSE
CLOSE
Pas